زجلياتي

عليك العمدة
على رقبتك ذمّة
وحنا رعيّة تايهة مجليّة
ضربها حمار الليل
ريقها ناشف
تسعى في ارض الله
طالبة جغمة ما
ريّها تالف
تقلّب على غيمة
في دروب طغى عليها الهمّ
تسيّف علينا
جانا في صورة مخزني
ف يدّو زرواطة
و ف حزامو سيف
قطاع طريق ما يرحم
دير الصّف شدّ الصّف
دخل سوق راسك
طلع
نزل
شكون قالها لك
بّق رّق طّق
آلطيف آلطيف
الدقّ فينا والقريح
واللّي قال آح
يزيدو تبريح

نادىِ فينا براحك آسيدي
عيّط فينا بوق .. صدّعنا
اللمّة .. اللمّة
يد ف يد نزيدوا قدام
نخرجو من زريبة البهايم
نحفرو بير, نسعاو الغيث
قبالتنا شريف عليه قبّة
شايلاه أسيدي
طالبين التّسليم
هاهوا جا , ها هوا جا
يتمختر
لابس ثوب حرير
وعلى راسو رزّة
قال تبعوني , تبعناه
صار يتخطّر بعرجة مفضوحة
ويجرجر ف رجليه
يتوكّا على ظّل مايل
ينوض ويطيح
وبجنبو فقيه حول يسبّح
يفتي الطريق عليه
هاذي حفرة ,هاذي ضاية ما
هذي حدورة , هادي طلعة
هذا حيط رايب , هذي تلّة احجار
هذا كلام مدرّح
قالب مدردح
أسيدي
علاش العثرة ف الوطى
والسّهل قلتي مسرّح
قلنا ما كاين باس غير عثرة
النّص منا
غرق ف قادوس عريان
قلنا ما كاين باس غير الظّلمة
النّص التاني مشا في خبر كان
إيوا صافي تقاضينا
ما بقا خاصناش
نخلوها على رقبتك سيدي
ملّي الوقت ما عطاتناش
اللّي شاط , شدّ الركنة
حديث ومغزل
ما طالعاش ما طالعاش
غزيل ف الوقت الضايع
بريم جوانات
جلسات أعشاش
كيف
سكرة
حشيش
وحديث ما يتقاداش

آسيدي أمولاي
خلّونا من التصباغ
بلا نمّي بلا تدباغ
جلدنا بهات بقوّة الفريك
ولوننا كشف
والطبايع ما بغات تزول
القهرة جرات ف عروقنا
غوّثنا بحيّينا
نشف ريقنا
وما طلنا قطرة ما
آسيدي آ مولاي
اللي ما عندو ما ف القربة
ما يقول انا ساقي
واللّي ما عندو فتيلة شاعلة ف راسو
ما يقول أنا قنديل
ما كانت الأرض العطشى تطمع
ف غمام الصّيف
ولا كانت الظلمة تجليها النجوم الباهتة
آسيدي آمولاي
ما بقا صفّ
ما بقا هفّ
تكون قمرة , أو تكون شمس
تكون شتا , أو تكون سحابة
سبق عجاجك الربيع
وحرق صهدك السنبولة
وما بقينا طامعين ف صابة
خلّي التوالى يجيبو خبار
كما قالولنا
اللّي زرع الدّم ما يحصد غير القيح
واللّي عصّر الحنظل
ما يخمّر غير الشّيح
واللّي استحمر الجواد ودارو مطيّة الذلّ
يجمح بيه ولو كان لجامو سلاسل
واللي ينقّز لا بدّ يطيح

بارك الله فيك أخي لا تحرمنا من